ពាក្យផ្តើម
ខ្ញុំព្រះករុណាអាត្មាភាពឈ្មោះ
យ័ញ មិញ គឿង បួសនៅ
វត្តរាជៈកុសលបំពេញជ័យ"ស្វាយ" ភូមិស៊ឺងទៀង និគមសុកស៊ឺង ស្រុកហងដឹក ខេត្តគៀងយ៉ាង។
កាលដែលខ្ញុំរៀនបាលីទីពីរនៅវត្តស្វាយ ខ្ញុំបានតាំងចិត្តថា ថ្ងៃក្រោយបើមានឱកាសខ្ញុំនឹងជាវព្រះត្រៃបិដកដំកល់ទុកក្នុងវត្តសម្រាប់ព្រះសង្ឃសិក្សានិងស្រាវជ្រាវ ។ កន្លងទៅជាយូរឆ្នាំមក ក្តីប្រាថ្នារបស់ខ្ញុំមិនទាន់ក្លាយទៅជាការពិត ហើយខ្ញុំក៏មិនដែលប្រាប់ដល់អ្នកណាដែរ ។ ខ្ញុំបានអានព្រះត្រែបិដកលើគេហទំព័រផ្សេងៗ ឃើញថាមិនសូវសំបូរបែប អំពីការរាវរកតាមពាក្យគន្លឹះ ។ ពេលនោះគំនិតចាស់របស់ខ្ញុំក៏កើតឡើង ខ្ញុំយល់ឃើញថា៖ បើសិនជាយើងធ្វើរបៀបស្វែងរកតាមពាក្យគន្លឹះផង តាមមាតិកាផង នឹងងាយស្រួលដល់អ្នកអាន អ្នកស្រាវជ្រាវ ក៏ដូចជាអ្នកសិក្សាព្រះត្រៃបិដកមិនខាន ខ្ញុំក៏សម្រេចចិត្តបង្កើតគេហទំព័រឡើងបានជារូបរាងដូចដែលញាតិមិត្តបានឃើញនេះ ។
ខ្ញុំសង្ឃឹមថា គេហទំព័រនេះជាប្រភពមួយដែលអាចផ្ដល់ចំណេះដឹងដល់ពុទ្ធសាសនិក និងអ្នកសិក្សាព្រះពុទ្ធសាសនា ព្រោះនេះជាព្រះពុទ្ធវាចនៈដែលបានចម្លងចាកគម្ពីរបិដក ជាគោលអាងមួយក្នុងព្រះពុទ្ធសាសនា ។
ខ្ញុំព្រះករុណាអាត្មាភាពសូមអរព្រះគុណ និងអរគុណដល់ញាតិមិត្តទាំងឡាយដែលបានជួយវាយចម្លងអក្សរ ពិនិត្យអក្ខរាវិរុទ្ធ ផ្ទៀងអត្ថបទតាមច្បាប់ដើមនៃគម្ពីរបិដក ។ អាត្មាភាពសូមថ្លែងអំណរគុណជាពិសេសដល់ឧបាសិកា ម៉ម នរម ដែលបានផ្ញើប្រគេនទិន្នន័យព្រះត្រៃបិដកមកអាត្មា ។
តំណភ្ជាប់ខាងក្រោមនេះជាព្រះត្រៃបិដកអេឡិចត្រូនិក(.pdf)ដែលបានស្កែនដោយគេហទំព័រ
៥០០០ ឆ្នាំ មានគ្រប់១១០ភាគ ញាតិមិត្តអាចទាញយកដើម្បីអាន និងចែកជាធម្មទានតាមដែលត្រូវការ ។
« http://www.mediafire.com/?4yyqhp6n77ij6 »
ជាទីបញ្ចប់ មហាកុសលទាំងឡាយ សូមចែកជូនដល់អ្នកបម្រើការក្នុងព្រះពុទ្ធសាសនា ឱ្យបានភាគផលស្មើរៗគ្នា ជួបតែសេចក្ដីសុខ និងសេចក្ដីចម្រើនកុំបីអាក់ខានឡើយ ។
សូមអរព្រះគុណ និងអរគុណ !
ភិក្ខុ គុណឃោសោ យ័ញ មិញ គឿង