ព្រះត្រៃបិដក ភាគ ៥៦

 ​(​នន្ទ​សេន​ឧបាសក​សួរ​ថា​)​ ​ម្នាលនាង​ទេវធីតា​ ​នាង​មាន​សម្បុរ​ដ៏​រុងរឿង​ ​ភ្លឺស្វាង​ទួទៅ​សព្វ​ទិស​ទាំងឡាយ​ ​ដូចជា​ផ្កាយព្រឹក​ ​សម្បុរ​របស់​នាង​ប្រាកដ​ដូច្នោះ​ ​ដោយហេតុ​ដូចម្ដេច​ ​ផល​នៃ​សុចរិត​ ​សំរេច​ដល់​នាង​ក្នុង​ទីនេះ​ ​ដោយហេតុ​ដូចម្ដេច​ ​ភោគៈ​ទាំងឡាយ​ណា​នីមួយ​ ​ដែល​ជាទី​ពេញចិត្ត​ ​កើតឡើង​ដល់​នាង​ ​
​ ម្នាលនាង​ទេវធីតា​ ​មាន​អានុភាព​ច្រើន​ ​យើង​សូម​សួរ​នាង​ ​នាង​កាល​កើតជា​មនុស្ស​ ​បាន​ធ្វើ​បុញ្ញា​កម្ម​ដូចម្ដេច​ ​នាង​ជា​ទេវធីតា​មាន​អានុភាព​រុងរឿង​យ៉ាងនេះ​ ​ដោយ​បុញ្ញា​កម្ម​ដូចម្ដេច​ ​ទាំង​សម្បុរ​របស់​នាង​ក៏​ភ្លឺ​សព្វ​ទិស​។​
​ (​នាង​ប្រេត​ ​តប​ថា​)​ ​ម្នាល​នន្ទ​សេន​ ​ខ្ញុំ​ឈ្មោះ​នន្ទា​ ​ជា​ភរិយា​របស់​អ្នក​ក្នុង​កាលមុន​ ​បាន​ធ្វើអំពើ​អាក្រក់​ ​ទើបបាន​ទៅ​អំពី​មនុស្សលោក​នេះ​ ​កាន់​បេតលោក​ ​ខ្ញុំ​ត្រេកអរ​ដោយ​ទាន​របស់​អ្នក​ ​ដែល​បាន​ឲ្យហើយ​ ​ទើប​ឥតមាន​ភ័យ​ក្នុង​ទី​ណាៗ​ឡើយ​។​ ​ម្នាល​គហបតី​ ​អ្នក​ ​ព្រមទាំង​ពួក​ញាតិ​ទាំងអស់គ្នា​ ​ចូរ​រស់នៅ​អស់​កាលយូរ​ ​ម្នាល​គហបតី​ ​អ្នក​ខំ​ប្រព្រឹត្ត​ធម៌​ ​ខំ​ឲ្យ​ទាន​ក្នុង​លោក​នេះ​ ​នឹង​ចូល​ទៅកាន់​ទិព្វ​ស្ថាន​ដែល​មិន​មាន​សោក​ ​មិន​មាន​ធូលី​ ​ជាទី​នៅ​នៃ​វសវត្តី​ទេវរាជ​ទាំងឡាយ​។​
​ អ្នក​ចូរ​បន្ទោបង់​នូវ​មន្ទិល​ ​គឺ​សេចក្ដី​កំណាញ់​ ​ព្រមទាំង​ឫសគល់​ចេញ​ ​ប្រាសចាក​និន្ទា​ ​ចូល​ទៅកាន់​ឋានសួគ៌​។​

​ចប់​ ​រឿ​ងន​ន្ទា​ប្រេត​ ​ទី៤​។​

ថយ | ទំព័រទី ៣៥ | បន្ទាប់
ID: 636866408734961970
ទៅកាន់ទំព័រ៖