ព្រះត្រៃបិដក ភាគ ៥៩

 ​[​៧០៩​]​ ​(​បិតា​របស់​ធម្មបាល​ ​តប​ថា​)​ ​ពួក​យើង​ប្រព្រឹត្ត​ធម៌​ ​មិន​និយាយ​កុហក​ ​វៀរ​នូវ​អំពើ​ដ៏​លាមក​ ​វៀរ​នូវ​អំពើ​មិន​ប្រសើរ​គ្រប់យ៉ាង​ ​ព្រោះហេតុនោះ​ឯង​ ​ទើប​ពួក​ជន​នៅក្មេង​ ​(​ក្នុង​ត្រកូល​)​ ​របស់​ពួក​យើង​មិន​ស្លាប់​។​
​ [​៧១០​]​ ​ពួក​យើង​ស្តាប់ធម៌​របស់​អសប្បុរស​ផង​ ​សប្បុរស​ផង​ ​ប៉ុន្តែ​ពួក​យើង​ ​មិន​ពេញចិត្ត​នឹង​ធម៌​របស់​ពួក​អសប្បុរស​ទេ​ ​ពួក​យើង​លះបង់​អសប្បុរស​ ​មិន​លះបង់​សប្បុរស​ទេ​ ​ព្រោះហេតុនោះ​ឯង​ ​ទើប​ពួក​ជន​នៅក្មេង​ ​(​ក្នុង​ត្រកូល​)​ ​របស់​ពួក​យើង​មិន​ស្លាប់​។​
 ​[​៧១១​]​ ​ពួក​យើង​ ​មានចិត្តល្អ​ក្នុង​កាលមុន​ឲ្យ​ ​កាល​កំពុង​ឲ្យ​ ​ក៏​មានចិត្ត​ត្រេកអរ​ ​លុះ​ឲ្យហើយ​ ​មិន​ក្តៅក្រហាយ​ក្រោយ​ ​ព្រោះហេតុនោះ​ឯង​ ​ទើប​ពួក​ជន​នៅក្មេង​ ​(​ក្នុង​ត្រកូល​)​ ​របស់​ពួក​យើង​មិន​ស្លាប់​។​
​ [​៧១២​]​ ​ពួក​យើង​ ​បាន​ញុំាង​ពួក​សមណព្រាហ្មណ៍​ ​អ្នកដំណើរ​ ​ស្មូម​ ​យាចក​ ​និង​អ្នក​កំសត់​ ​ឲ្យ​ឆ្អែត​ស្កប់ស្កល់​ដោយ​បាយ​ ​និង​ទឹក​ ​ព្រោះហេតុនោះ​ឯង​ ​ទើប​ពួក​ជន​នៅក្មេង​ ​(​ក្នុង​ត្រកូល​)​ ​របស់​យើង​មិន​ស្លាប់​។​
ថយ | ទំព័រទី ១៨៧ | បន្ទាប់
ID: 636868120363511523
ទៅកាន់ទំព័រ៖