ព្រះត្រៃបិដក ភាគ ៨១
[១៧៥] បណ្តាបច្ចយាការទាំងនោះ ជរា និងមរណៈកើតមាន ព្រោះជាតិជាបច្ច័យ តើដូចម្តេច។ ជរាក៏មាន មរណៈក៏មាន។ បណ្តាជរា និងមរណៈនោះ ជរា តើដូចម្តេច។ ការចាស់ ការគ្រាំគ្រា ការរួញថយអាយុណា នៃធម៌ទាំងនោះ នេះហៅថា ជរា។ បណ្តាជរា និងមរណៈនោះ មរណៈ តើដូចម្តេច។ ការអស់ ការសូន្យ ការបែកធ្លាយ ការបែកខ្ចាត់ខ្ចាយ ការមិនទៀង ការបាត់បង់ណា នៃធម៌ទាំងនោះ នេះហៅថា មរណៈ។ ជរានេះផង មរណៈនេះផង នេះហៅថា ជរា និងមរណៈកើតមាន ព្រោះជាតិជាបច្ច័យ ដោយប្រការដូច្នេះ។
[១៧៦] សេចក្តីត្រង់ពាក្យថា ហេតុជាទីកើតឡើងនៃកងទុក្ខទាំងអស់នុ៎ះ រមែងមាន ដោយអាការយ៉ាងនេះ ដូចតទៅនេះ។ ការចួបជុំ ការមូលមក ការប្រជុំចុះ ការកើតប្រាកដ នៃកងទុក្ខទាំងអស់នុ៎ះ រមែងមានដោយអាការយ៉ាងនេះ ព្រោះហេតុនោះ ទើបពោលថា ហេតុជាទីកើតឡើងនៃកងទុក្ខទាំងអស់នុ៎ះ រមែងមានដោយអាការយ៉ាងនេះឯង។
ចប់ អកុសលមូលកវិបាកនិទ្ទេស។
ចប់ អភិធម្មភាជនីយ។
ចប់ បច្ចយាការវិភង្គ។
ID: 637647409514119123
ទៅកាន់ទំព័រ៖