ព្រះត្រៃបិដក ភាគ ៩៤
[៤] ពាក្យថា អធិបតិប្បច្ច័យ បានដល់ឆន្ទាធិបតិ ជាបច្ច័យ នៃពួកធម៌ដែលប្រកបដោយឆន្ទៈផង នៃពួករូបដែលកើតអំពីឆន្ទៈនោះផង ដោយអធិបតិប្បច្ច័យ វីរិយាធិបតិ ជាបច្ច័យ នៃពួកធម៌ដែលប្រកបដោយវីរិយៈផង នៃពួករូបដែលកើតអំពីវីរិយៈនោះផង ដោយអធិបតិប្បច្ច័យ ចិត្តាធិបតិ ជាបច្ច័យ នៃពួកធម៌ដែលប្រកបដោយចិត្តផង នៃពួករូបដែលកើតអំពីចិត្តនោះផង ដោយអធិបតិប្បច្ច័យ វីមំសាធិបតិ ជាបច្ច័យ នៃពួកធម៌ដែលប្រកបដោយវីមំសៈផង នៃពួករូប ដែលកើតអំពីវីមំសៈនោះផង ដោយអធិបតិប្បច្ច័យ ពួកធម៌ណាៗ ធ្វើនូវធម៌ណាៗ ឲ្យជាទីគោរព ហើយកើតឡើង ពួកធម៌នោះៗ គឺចិត្តចេតសិកធម៌ ជាបច្ច័យនៃពួកធម៌នោះៗ ដោយអធិបតិប្បច្ច័យ។
[៥] ពាក្យថា អនន្ដរប្បច្ច័យ បានដល់ចក្ខុវិញ្ញាណធាតុក្ដី ពួកធម៌ដែលប្រកបដោយចក្ខុវិញ្ញាណធាតុនោះក្ដី ជាបច្ច័យនៃមនោធាតុផង នៃពួកធម៌ដែលប្រកបដោយមនោធាតុនោះផង ដោយអនន្ដរប្បច្ច័យ មនោធាតុក្ដី ពួកធម៌ដែលប្រកបដោយមនោធាតុនោះក្ដី ជាបច្ច័យនៃមនោវិញ្ញាណធាតុផង នៃពួកធម៌ ដែលប្រកបដោយមនោវិញ្ញាណធាតុនោះផង ដោយអនន្ដរប្បច្ច័យ សោតវិញ្ញាណធាតុក្ដី ពួកធម៌ ដែលប្រកបដោយវិញ្ញាណធាតុនោះក្ដី ជាបច្ច័យនៃមនោធាតុផង នៃពួកធម៌ ដែលប្រកបដោយមនោធាតុនោះផង ដោយអនន្ដរប្បច្ច័យ
ID: 637827867804617264
ទៅកាន់ទំព័រ៖