សុខភាពសំខាន់

ថ្ងៃពុធ 25 មិនា 2015 - 09:04:49 ល្ងាច - បានអាន៖ 1079
បញ្ចូលដោយ៖ យ៉ាញ់ ទៀង

មានសុខភាពល្អ  យើងអាចបន្ត  ធ្វើអ្វីតាមចិត្ត
គ្រប់សព្វកិច្ចការ ប្រាថ្នាបានពិត ស្រស់ស្រាយក្នុងចិត្ត
ជីវិតថ្លៃថ្លា ។    
ពេលមានសុខភាព ឥតយកអ្វីប្រៀប ផ្ទឹមស្មើសោះណា
ទាំងក្មេងទាំងចាស់ រស់លើលោកា សុទ្ធតែប្រាថ្នា
បានសុខសាន្តត្រាណ  ។    
អ្នកមានអ្នកក្រ ពេលឈឺកម្រ បានសុខក្នុងប្រាណ
ទោះឈឺតិចពិត  ចិត្តឥតស្រាកស្រាន្ត  ក្រែងក្នុងសន្តាន
មានជម្ងឺធ្ងន់   ។    
ជម្ងឺច្រើនយ៉ាង យើងកុំសំអាង   លើការបែបន់
ត្រូវខ្លះខុសខ្លះ យើងកុំគ្នេរគ្នាន់ ត្រូវតែរួសរាន់
រកពេទ្យព្យាបាល  ។    
ទោះមានលុយច្រើន ទ្រព្យភោគចម្រើន ហូរចូលគ្រប់កាល
តែបើឈឺហើយ ទិញបានស្រាល ៗ  ធ្ងន់ធ្ងកុំអាល
ថាលុយទិញបាន  ។    
សុខភាពសំខាន់ មានក្នុងរូបក្ខន្ធ នៃយើងរាល់ប្រាណ
ទឹកមុខស្រស់ថ្លា បានល្អសុខសាន្ត រស់នៅក្សេមក្សាន្ត
ផុតក្តីមួហ្មង    ។    
ខំធ្វើសីលទាន  ភាវនាឲ្យមាន កុំឲ្យឆ្គាំឆ្គង
តិចតួចស្តួចស្តើង កុំដើររំលង បានសុខទុក្ខផង
ឆ្លងដោយសទ្ធា   ។    
មិនបានជាតិនេះ យើងត្រូវតម្រេះ   ជាតិមុខទៀតណា
កើតចាស់ឈឺស្លាប់ ជារឿងធម្មតា នេះហើយហៅថា
សង្ខារមិនទៀង  ។    
តែសូមជ្រាបថា  ត្រូវថែរក្សា សុខភាពកុំល្អៀង
សុខភាពបានល្អ សទ្ធាខាត់លាង ឲ្យជ្រះថ្លាទៀង
ទើបបានផលពេញ    ។    
ខ្ញុំបាទក៏សូម ជូនពរញាតិញោម រកស៊ីចំណេញ
សុខរាងរហូត កុំបីទោម្នេញ សុខភាពពេញលេញ
សូមកុំភ្លេចព្រះធម៌    ៕    
    ដោយ៖​​ យ័ញ ទៀង

អត្ថបទផ្សេងៗទៀត

អាសូរអ្នកម្តាយ - ថ្ងៃពុធ 01 មិថុនា 2016 - យ៉ាញ់ ទៀង
ស្រុកស្វាយមាន ១៤ ភូមិ - ថ្ងៃព្រហស្បតិ៍ 23 តុលា 2014 - យ៉ាញ់ ទៀង
ព្រះ​ធម៌ - ថ្ងៃសុក្រ 28 វិច្ឆិកា 2014 - យ៉ាញ់ ទៀង
ឆន្ទៈនៃព្រះចៅអធិការវត្ត ស្វាយ - ថ្ងៃសុក្រ 22 មេសា 2016 - គុណ ឃោសោ
សាលាបាលីខេត្តឃ្លាំង - ថ្ងៃពុធ 01 មិថុនា 2016 - យ៉ាញ់ ទៀង
កំណាព្យរបស់ធម្មាចារ្យ ឆឹង កាន - ថ្ងៃអង្គារ 11 វិច្ឆិកា 2014 - គុណ ឃោសោ